မားကတ်တင်း လမ်းပြကြယ်

S.T.A.R ဆိုတဲ့စာလုံးမှာ စကားလုံး (၄) လုံးပါဝင်ပါတယ်။

ပင်လယ်ပြင်မှာ လမ်းပျောက်သူများအတွက် ကောင်းကင်မှာ ရှိတဲ့ကြယ်လေးတစ်လုံးက များစွာအထောက်အကူဖြစ်စေနိုင်သလိုပဲ ၊

ဈေးကွက်မှာ လမ်းပျောက်ပြီးဘာလုပ်ရမှန်းမသိဘူးဆိုတဲ့သူများအတွက် ..

ကြယ်လေးတစ်လုံးအဖြစ် ဒီ ဈေးကွက်လမ်းပြကြယ် Marketing Star ကို မျှဝေလိုက်ပါတယ်။

S.T.A.R ( မားကက်တင်း လမ်းပြကြယ် )

***********************

1. See

ဈေးကွက်မှာ ကိုယ့်ကုန်ပစ္စည်းကို များများမြင်အောင်လုပ်ပါ။

မြင်ပါများတော့ ယဉ်၊

ယဉ်ပါများတော့ ခင် တာပါပဲ။

ခင်တဲ့မင်တဲ့သူ ကို ကိုယ်လိုအပ်လာချိန်မှာ သတိရသလိုပဲ ..

ဈေးကွက်မှာ ထုတ်ကုန်ပစ္စည်းတွေအများကြီးထဲက .. စားသုံးသူတွေလိုအပ်လာချိန်မှာ ကိုယ့်ကုန်ပစ္စည်းကို သတိရနေဖို့လိုပါတယ်။

ကိုယ့် ထုတ်ကုန်ပစ္စည်းကို များများမြင်အောင်လုပ်ပါ။

ကိုယ့်ကြော်ငြာကို များများမြင်အောင်လုပ်ပါ။

များများမရောင်းရသေးတာ .. များများ မမြင်ကြသေးလို့ပါ။

များများမြင်အောင်လုပ်ရင်… များများရောင်းရပါလိမ့်မယ်။

2. Try

များများ စမ်းသုံးကြည့်စေပါ။

အရသာကောင်းမကောင်း မြည်းကြည့်မှ သိပါတယ်။

လူကောင်းမကောင်း ပေါင်းကြည့်မှ သိပါတယ်။

ပစ္စည်းကောင်းမကောင်း သုံးကြည့်မှ သိပါတယ်။

ကွာလတီ ဆိုတာ သုံးကြည့်တဲ့ အတွေ့အကြုံကနေ လာပါတယ်။

ကိုယ့်ထုတ်ကုန်ပစ္စည်းကို လူများများ သုံးကြည့်စေပါ။

ဝယ်ယူသူတွေရော၊ မဝယ်ရသေးသူတွေပါ လူများများ သုံးကြည့်နိုင်မယ့် နည်းလမ်းတွေ စဉ်းစားပါ။

ဝယ်မှမဟုတ်ပဲ .. စမ်းသုံးသူတွေများလာအောင်လုပ်ပါ။

ကိုယ့်ကုန်ပစ္စည်းပေါ်မှာ ယုံကြည်မှုအပြည့်အဝရှိတယ်ဆိုရင် ဝယ်ဝယ်မဝယ်ဝယ် စမ်းသုံးခိုင်းကြည့်လိုက်ပါ။

ဝယ်သူတွေ များလာပါလိမ့်မယ်။

3. Available

နေရာများများ မှာ ရနိုင်အောင်လုပ်ပါ။

ဝယ်ယူမှုတော်တော်များများက အလွယ်တကူ ရနိုင်မရနိုင် နဲ့ဆိုင်ပါတယ်။

စတိုးဆိုင်မှာ ခင်းကျင်းထားတဲ့ ပစ္စည်းစင် ပေါ်မှာ လွယ်လွယ်ကူကူ လှမ်းယူနိုင်တဲ့ ပစ္စည်းက မြင့်လွန်း နိမ့်လွန်းမှာ ခင်းကျင်းထားတဲ့ ပစ္စည်းတွေထက် ပိုရောင်းရပါတယ်။

တစ်နေရာတည်းမှာတောင် လှမ်းယူရခက်လို့မဝယ်ကြဘူး ဆိုရင် ကိုယ့်ပစ္စည်းကို တစ်နာရီလောက်ကားမောင်းပြီး တစ်ဆိုင်ပြီး တစ်ဆိုင်ရှာဝယ်ဖို့ဆိုတာ ကိုယ့်ပစ္စည်းက တန်ဖိုးကြီးလွန်းမှပဲ ဖြစ်နိုင်ပါလိမ့်မယ်။

အိမ်ဆိုင်မှာလဲ ရနိုင်သလို၊ အွန်လိုင်းမှာ လဲ ရနိုင်အောင်လုပ်ပါ။

ကိုယ့်ဆိုင်မှာလဲ ရနိုင်သလို ၊ သူများဆိုင်တိုင်းမှာလဲ ရနိုင်အောင်လုပ်ပါ။

ကိုယ့်မြို့မှာလဲ ရနိုင်သလို ၊ မြို့တိုင်းမှာလဲ ရနိုင်အောင်လုပ်ပါ။

နေရာများများ ရနိုင်လေလေ၊ အရောင်းများများ ရလေလေပါ။

4. Reputation

ဂုဏ်သတင်း ပျံ့နှံ့စေပါ။

နာမည်ကောင်းဆိုတာ ဂုဏ်သတင်းပါပဲ။ ဒါကိုပဲ ဘရန်းလို့လဲ ခေါ်ကြပါတယ်။ ကိုယ့်မှာ ဂုဏ်သတင်းကောင်းရှိတယ်ဆိုရင် များများ မြန်မြန် ပျံ့နှံ့စေပါ။ ပန်းသတင်းလေညှင်းဆောင်သလို ၊ ဂုဏ်သတင်း လူချင်း ဆောင်ပြီး တစ်ယောက်စကား၊ တစ်ယောက်နားမှာ ကြားသိရအောင် မားကက်တင်း လုပ်ဆောင်ပါ။

မရောင်းရသေးဘူးဆိုတာ ကိုယ့်ဂုဏ်သတင်း ၊ ကောင်းသတင်းကို လူမသိသေးတာပါ။

ကိုယ့်ဂုဏ်သတင်းကို များများသိလေလေ၊ လူများများ စိတ်ဝင်စားလေလေပါပဲ။

စိတ်ဝင်စားသူများလေလေ၊ ဝယ်ယူသူများလေလေပါပဲ။

လူတိုင်းမှာ ကောင်းတဲ့ အချက်လေးတွေ ရှိပါတယ်။

လုပ်ငန်းတိုင်းမှာလဲ ကောင်းတဲ့အချက်လေးတွေရှိပါတယ်။ လူသိများတာနဲ့မများတာပဲကွာတာပါ။

လုပ်ငန်းတစ်ခုအနေနဲ့ အဲဒီ ကောင်းဂုဏ် ကို ပျံ့နှံ့စေပြီး လူသိများအောင်လုပ်ဖို့ပဲ လိုပါတယ်။

မလုပ်တတ်ရင်တော့ ကျွန်တော် မာသင် ရေးတဲ့ “ဘရန်းမားကက်တင်း – ကိုယ်ပိုင်ဘရန်း နှင့် စီးပွားရေးဘရန်းတည်ဆောက်ခြင်း အိုင်ဒီယာ (၃၀)” ဆိုတဲ့ စာအုပ်ကို ဝယ်ဖတ်ဗျာ။ ပြီးတော့ တစ်ခုချင်းစီလုပ်ဗျ။ ကြော်ငြာတာ။

ကဲ .. ဈေးကွက်မှာ လမ်းပျောက်ပြီး ကိုယ့်စီးပွားရေးလုပ်ငန်းအတွက် ဘာလုပ်ရမှန်းမသိဘူးဗျာ ဆိုရင် အခု ရှင်းပြထားတဲ့ S.T.A.R ဆိုတဲ့ မားကက်တင်း စတား လေးခု ကို တစ်ခုချင်းစီ စဉ်းစားပြီးလုပ်ကြည့်ပါ။

လွယ်လွယ်ကူကူ စာတိုလေးနဲ့မှတ်ချင်ရင်တော့ …

“ မားကက်တင်းစတား၊ ကြိမ်ဖန်ပွား၊ စီးပွားတက်မည်တည့်” ပေါ့ဗျာ။ …. ။

စာဖတ်သူများ လုပ်ငန်းကောင်းရောင်းအားတက်ကြပါစေ။

မာသင်

လိုတိုရှင်းမျှဝေသည်။